తెలంగాణకేసీఆర్‌ దూకుడు మర్మమేంటో!

 తెలంగాణకేసీఆర్‌ దూకుడు మర్మమేంటో!

Feb 15 2022 @ 01:50AMహోం

కర్ణాటకతో పాటే వచ్చే ఏడాది మే లోపు ముందస్తు ఎన్నికలకు వెళ్లే యోచన

అక్కడ కాంగ్రెస్‌ గెలిస్తే ఇక్కడ ఆ పార్టీకి అనుకూల పరిస్థితులుంటాయని అంచనా

 టీఆర్‌ఎస్‌, కాంగ్రెస్‌, బీజేపీ ముక్కోణపోటీ

మళ్లీ అధికారమే కేసీఆర్‌ వ్యాఖ్యల లక్ష్యం!

టీఆర్‌ఎస్‌ వర్గాల్లో ఆసక్తికరమైన చర్చ

కర్ణాటకతో పాటే వచ్చే ఏడాది మే లోపు ముందస్తు ఎన్నికలకు వెళ్లే యోచన.. 

 మళ్లీ అధికారమే కేసీఆర్‌ వ్యాఖ్యల లక్ష్యం

 టీఆర్‌ఎస్‌ వర్గాల్లో ఆసక్తికరమైన చర్చ

హైదరాబాద్‌, ఫిబ్రవరి 14 (ఆంధ్రజ్యోతి): ఇటీవల వరుస మీడియా సమావేశాలు, బహిరంగ సభల్లో సీఎం కేసీఆర్‌ చేస్తున్న వ్యాఖ్యల వెనుక మర్మం ఏమిటనే చర్చ టీఆర్‌ఎస్‌ వర్గాల్లో జరుగుతోంది. కేంద్రంలోని బీజేపీ సర్కారుకు, ప్రధాని మోదీకి వ్యతిరేకంగా దూకుడు పెంచినా.. కాంగ్రె్‌సతో సంబంధం లేదంటూనే ఆ పార్టీ జాతీయ నేత రాహుల్‌గాంధీకి అనూహ్యంగా మద్దతు పలికినా.. ఆయన రాజకీయ వ్యూహంలో భాగమేనని ఆ వర్గాలు పేర్కొంటున్నాయి. ఈ వ్యాఖ్యలన్నీ ఆయన దూరదృష్టితో చేస్తున్నవేనని అంచనా వేస్తున్నాయి. రాష్ట్రంలో పార్టీ అధికారాన్ని నిలబెట్టడం.. అంటే, వరుసగా మూడోసారి అసెంబ్లీ ఎన్నికల్లో గెలుపొందడమే లక్ష్యంగా సీఎం కార్యాచరణను చూడాల్సి ఉంటుందని టీఆర్‌ఎస్‌ ముఖ్యులు కొందరు విశ్లేషిస్తున్నారు.

మళ్లీ అసెంబ్లీ ముందస్తు ఎన్నికలకు రంగం సిద్ధం చేయడం, టీఆర్‌ఎ్‌స-కాంగ్రె్‌స-బీజేపీ మధ్య ముక్కోణ పోటీ కోరుకోవడం తమ అధినేత ప్రస్తుత ఎత్తుగడల వెనుక వ్యూహం కావచ్చని పార్టీ సీనియర్లు అభిప్రాయపడుతున్నారు. టీఆర్‌ఎస్‌ వర్గాల్లో జరుగుతున్న చర్చ ప్రకారం.. ముందస్తు అసెంబ్లీ ఎన్నికలకు వెళ్లడం, రాష్ట్రంలో కాంగ్రెస్‌ బలపడకుండా చూడటం కేసీఆర్‌ లక్ష్యాల్లో ముఖ్యమైనవిగా కనిపిస్తున్నాయి.

కర్ణాటక అసెంబ్లీతోపాటు.. కర్ణాటక అసెంబ్లీ పదవీకాలం 2023 మే 24న ముగుస్తుంది. ఆ ఎన్నికలతోపాటే తెలంగాణలోనూ అసెంబ్లీ ఎన్నికలకు వెళ్లాలని సీఎం కేసీఆర్‌ భావిస్తున్నట్టు చాలామంది టీఆర్‌ఎస్‌ నేతలు అభిప్రాయపడుతున్నారు. కర్ణాటకలో ఇప్పుడు అధికారంలో ఉన్న బీజేపీ కంటే, విపక్ష కాంగ్రె్‌సకు అనుకూల పరిస్థితులున్నాయని వారు అంచనా వేస్తున్నారు. అది కర్ణాటక అసెంబ్లీ ఎన్నికల నాటికి పెరిగి, ఒకవేళ కాంగ్రెస్‌ పార్టీ అక్కడ అధికారంలోకి వస్తే.. ఆ ప్రభావం పొరుగు రాష్ట్రమైన మనపైనా (తెలంగాణపై) పడుతుందని విశ్లేషిస్తున్నారు. అదే జరిగితే రాష్ట్రంలో కాంగ్రెస్‌ పార్టీకి అన్ని రకాలుగా బలం చేకూరుతుందని, ఇది తమకు నష్టం చేస్తుందని వారు అంటున్నారు. ఈ పరిస్థితికి చెక్‌ పెట్టాలంటే, కర్ణాటక అసెంబ్లీతోపాటు, తెలంగాణ అసెంబ్లీకి ఎన్నికలు జరగాలని టీఆర్‌ఎస్‌ వర్గాలు కోరుకుంటున్నాయి.

వాస్తవానికి తెలంగాణ అసెంబ్లీ పదవీకాలం 2024, జనవరి 16న ముగుస్తుంది. అంతకంటే ఆరు నెలల ముందు ఎప్పుడైనా ఈసీ ఎన్నికలు నిర్వహించవచ్చు. ఈ నేపథ్యంలో.. ‘‘కర్ణాటక అసెంబ్లీతోపాటు ఇక్కడా ఎన్నికలు రావాలంటే ఈ ఏడాది నవంబర్‌-డిసెంబర్‌లో ఇక్కడ అసెంబ్లీని రద్దు చేయాలి. ఏడాది పదవీకాలాన్ని వదులుకోవాలి. అప్పుడే ఇక్కడ కాంగ్రెస్‌ నుంచి పోటీని నివారించగలుగుతాం’’ అని టీఆర్‌ఎస్‌ ముఖ్యులు చెబుతున్నారు.

అయితే.. ‘‘మరోసారి ముందస్తు ఎన్నికలకు వెళ్లాలంటే, అందుకు కారణాలను ప్రజలకు చెప్పడంలో సఫలీకృతులం కావాలి. ఇందులో విఫలమైతే మాత్రం, మొదటికే మోసం రావచ్చు’ అనే ఆందోళన కూడా వారిలో వ్యక్తమవుతోంది. పైగా కేంద్రంలోని బీజేపీ సర్కారుతో రాజకీయ యుద్ధానికి దిగడం, స్వయంగా ప్రధాని మోదీపై వ్యక్తిగత విమర్శలు చేయడం వల్ల.. ముందస్తు ఎన్నికలకు వెళ్లాలనుకుంటే, వారి నుంచి ఇదివరకటి సహకారం ఉంటుందని ఊహించలేమని.. అసెంబ్లీని రద్దు చేశాక కేంద్రం ఉద్దేశపూర్వకంగా గవర్నర్‌ పాలన తెస్తే, కొత్త తలనొప్పులు తప్పవని వారు అంటున్నారు.

బీజేపీ బలం పెరిగితేనే..తాము ముందస్తు అసెంబ్లీ ఎన్నికలకు వెళ్లినా, వెళ్లకపోయినా.. రాష్ట్రంలో బీజేపీ బలపడితేనే తమకు రాజకీయంగా లాభమని అధికార పార్టీ వర్గాలు అభిప్రాయపడుతున్నాయి. దీనివల్ల టీఆర్‌ఎ్‌స-కాంగ్రె్‌స-బీజేపీ మధ్య ముక్కోణ పోటీ జరిగి అంతిమంగా తమకు ప్రయోజనం కలుగుతుందని, మళ్లీ అధికారంలోకి రాగలుగుతామని ఆ వర్గాలు పేర్కొంటున్నాయి. ఎనిమిదేళ్ల నుంచి అధికారంలో ఉన్న టీఆర్‌ఎస్‌ ప్రభుత్వంపై ఎంతో కొంత వ్యతిరేకత సహజమని.. ఆ వ్యతిరేక ఓట్లు గంపగుత్తగా ఒకే పార్టీకి, అదీ కాంగ్రె్‌సకు పడకుండా, బీజేపీ కూడా వ్యతిరేక ఓట్లను భారీగా పొందాలనేది తమ వ్యూహమని వివరిస్తున్నాయి.

‘‘తెలంగాణలో బతికిచెడ్డ కాంగ్రె్‌సకు ఇంకా ఓటు బ్యాంక్‌ ఉంది. అది టీఆర్‌ఎస్‌ ప్రభుత్వ వ్యతిరేకతతో పుంజుకోవద్దు. కాంగ్రెస్‌ మా సమీపంలోకి రాకుండా ఉండాలంటే, బీజేపీ బలంగా మారాలి’’ అని టీఆర్‌ఎస్‌ ముఖ్యులు చెబుతున్నారు. ఈ కోణంలోనే రాష్ట్రంలో బీజేపీతోనే తమకు పోటీ అన్నట్లుగా తమ అధినేత విమర్శలు ఉంటున్నాయని వారు విశ్లేషిస్తున్నారు. ‘‘బీజేపీ ఓటు బ్యాంక్‌ రాష్ట్ర స్థాయిలో సింగిల్‌ డిజిట్‌ దాటదు. ఆ పార్టీకి సరైన అభ్యర్థులు కూడా లేరు. అటువంటి బీజేపీని టార్గెట్‌గా చేసుకోవడం వల్ల దానికి పెరిగే ఓట్లు, కచ్చితంగా ప్రభుత్వ వ్యతిరేక ఓట్లే అవుతాయి. బీజేపీ బలంగా మారకపోతే, ఆ ఓట్లు కాంగ్రె్‌సకి వెళ్తాయి. ఇది మాకు ఆమోదయోగ్యం కాదు’’ అనే చర్చ టీఆర్‌ఎస్‌ వర్గాల్లో జరుగుతోంది. 

రాహుల్‌కు అండగా అందుకే..కాంగ్రెస్‌ అగ్ర నేత రాహుల్‌గాంధీని ఉద్దేశించి బీజేపీ సీఎం హిమంత విశ్వశర్మ చేసిన వ్యాఖ్యలను సీఎం కేసీఆర్‌ తప్పుపట్టడం వెనుక కూడా రాజకీయ వ్యూహం ఉందని చెబుతున్నారు. రాహుల్‌గాంధీ, ఆయన కుటుంబానికి సీఎం కేసీఆర్‌ అండగా నిలవడం ఆలస్యం.. ‘వచ్చే ఎన్నికల్లో టీఆర్‌ఎ్‌స-కాంగ్రెస్‌ కలిసి పోటీ చేస్తాయి’ అనే వాదనను బీజేపీ తెరపైకి తెచ్చింది. ఇది నిజమా? కాదా? అనేది ఇప్పటికిప్పుడు తేలదుగానీ.. ఈ ప్రచారం కాంగ్రె్‌సకు రాజకీయంగా నష్టం చేస్తుందని, తమకు లాభం చేస్తుందని టీఆర్‌ఎస్‌ వర్గాలు చెబుతున్నాయి.

సీఎం కేసీఆర్‌ కాంగ్రె్‌సకు అనుకూలంగా మాట్లాడటం వల్ల వచ్చే ఎన్నికల్లో ఆ పార్టీకి ఓటు వేసినా, టీఆర్‌ఎ్‌సకి ఓటు వేసినా ఒకటేననే అభిప్రాయం కలుగుతుందని, అప్పుడు కాంగ్రె్‌సకి పడే ఓట్లు తమకే పడే అవకాశం ఉంటుందని అభిప్రాయపడుతున్నాయి. అయితే.. ప్రస్తుతానికి రాజకీయంగా అంతగా బలంగా లేని బీజేపీని ప్రధాన శత్రువుగా చిత్రీకరించి యుద్ధం చేయడం, తమ వనరులు, శక్తిని ఆ పార్టీపై వెచ్చించడం ఎంతవరకు సబబనే ప్రశ్న కూడా టీఆర్‌ఎస్‌ వర్గాల్లో ఉత్పన్నమవుతోంది. బీజేపీ సర్కారు రాఫెల్‌, అమెరికా ఎన్నికల వంటి విషయాల్లో తప్పు చేసినప్పటికీ.. అవి జరిగినప్పుడు కాకుండా, ఇప్పుడు వేలెత్తిచూపటంపై  సాధారణ జనం వ్యక్తం చేస్తున్న సందేహాలకు తమ వద్ద జవాబు లేదని టీఆర్‌ఎస్‌ నేతలు కొందరు చెబుతున్నారు.

జాతీయస్థాయిలో కీలకపాత్ర సాధ్యమా?రాష్ట్రంలో 17 లోక్‌సభ స్థానాలు ఉన్నాయి. వాటితోనే జాతీయ రాజకీయాల్లో కీలకపాత్ర పోషించటం సాధ్యమా అనే ప్రశ్న పార్టీ వర్గాల నుంచి వ్యక్తమవుతోంది. 2019 లోక్‌సభ ఎన్నికల సమయంలోనూ కేంద్రంలో కీలకంగా వ్యవహరించాలని టీఆర్‌ఎస్‌ ఉవ్విళ్లూరిన సంగతి తెలిసిందే. కానీ, అప్పుడు పరిస్థితులు కలిసిరాలేదు. పూర్తిస్థాయి మెజారిటీ సాధించిన బీజేపీకి ఇతర పార్టీల అవసరం రాలేదు. రాష్ట్రంలో 16 చోట్ల గెలుస్తామని భావించిన టీఆర్‌ఎస్‌ తొమ్మిది స్థానాలకే పరిమితమైంది.

ఈ నేపథ్యంలో.. సీఎం కేసీఆర్‌ జాతీయ రాజకీయాలకు కాలు దువ్వుతుండడంపై పార్టీ వర్గాల్లో సానుకూలత వ్యక్తం కావట్లేదని టీఆర్‌ఎస్‌ నేతలు పలువురు చెబుతున్నారు. ‘‘జాతీయ పార్టీ పెట్టి ఉత్తరాదిలో మద్దతు పొందడం, కాంగ్రెస్‌, బీజేపీయేతర పార్టీలను ఒకే వేదికపైకి తీసుకురావడం అంత సులువు కాదు. ఒకవేళ తీసుకు వచ్చినా.. నాయకత్వ బాధ్యతల సమస్య తలెత్తుతుంది. అన్నింటికీ మించి.. రాష్ట్రంలోని 17 లోక్‌సభ స్థానాలనూ టీఆర్‌ఎస్‌ గెలుచుకుంటుందని చెప్పలేం. తక్కువ స్థానాల్లో గెలిచి, కేంద్రంలో చక్రం తిప్పటం వీలుకాకపోచ్చు’’ అని విశ్లేషకులు అంటున్నారు. 

యూపీ ఎన్నికల తర్వాతే స్పష్టత..సీఎం కేసీఆర్‌ రాజకీయ వ్యూహాలు అనూహ్యంగా ఉంటాయని, పూర్తిస్థాయిలో అంచనా వేయలేమని చాలా మంది టీఆర్‌ఎస్‌ ముఖ్యులు అభిప్రాయపడుతున్నారు. ఆయనకు ఆయనగా లీకులు ఇవ్వాలని భావిస్తే తప్ప.. ఆయన మదిలో ఏమున్నదో తెలుసుకోవటం అసాధ్యమని చెబుతున్నారు. అయితే ప్రస్తుతం జరుగుతున్న ఐదు రాష్ట్రాల ఎన్నికలు, ముఖ్యంగా ఉత్తరప్రదేశ్‌ అసెంబ్లీ ఎన్నికల ఫలితాల తర్వాత సీఎం కేసీఆర్‌ మాటల వెనుక మర్మంపై స్పష్టత రావచ్చని అంటున్నారు.